按：王蓮生躺在榻牀右首，吸菸過癮；復調過左首來，吸上三口，漸覺眉低眼合，像是煙迷。張蕙貞裝好一口煙，將槍頭湊到嘴邊，替蓮生把火。蓮生搖手不吸。蕙貞輕輕放下煙槍，要坐起來。蓮生一手扳住蕙貞胸脯，說：“耐也吃一筒囗。”蕙貞道：“我（要勿）吃；吃上仔癮，阿好做生意嗄？”蓮生道：“陸裡會上？小紅一徑吃，勿曾有痛。”蕙貞道：“小紅自然。俚是本事好，生意會做，就吃上仔，也匆要緊。倪要像仔俚也好哉！”蓮生道：“耐說小紅會做生意，爲啥客人也無撥哉嗄？”蕙貞道：“耐怎曉得俚無撥客人？”蓮生道：“我看見俚前節堂簿，除脫仔我，就不過幾戶老客人叫仔二三十個局。”蕙貞道：“做仔耐一戶客人，再有二三十個局，也就好哉（口宛）。”蓮生道：“耐勿曉得；小紅也匆過去，俚開消大，爺孃兄弟有好幾個人來浪，才靠俚一干仔做生意。”蕙貞道：“爺孃、兄弟來裡小房子裡，陸裡有幾花開消？常恐俚自家個用場忒大仔點。”蓮生道：“俚自家倒無啥用場，就不過三日兩頭去坐坐馬車。”蕙貞道：“坐馬車也有限得勢。”蓮生道：“價末啥個用場嗄？”蕙貞道：“倪怎曉得俚？”
蓮生便不再問，自取煙盤內所剩兩枚煙泡，且燒且吸，移時始盡；於是一手扶住榻牀欄杆，擡身坐起。蕙貞知道是要吸水煙，忙也起身，取一支水煙筒，就在榻牀邊挨着蓮生肩膀偎倚而坐，裝水煙與蓮生吸，蓮生吸了兩筒，復問道：“耐說小紅自家用場大。是啥個用場，耐說說看囗。”蕙貞略怔一怔道：“倪是說說罷哉呀，小紅自家末再有啥個用場，耐（要勿）到小紅搭去瞎說瞎話。倘然耐說仔啥末，俚只道倪說仔俚邱話，再撥俚罵。”蓮生笑道：“耐說末哉，我阿去告訴小紅！”蕙貞大聲道：“教我說啥物事嗄？耐搭小紅三四年老相好，再有啥勿曉得？倒來問倪！”蓮生笑而嘆道：“耐末真真是謅頭！小紅說仔耐幾花邱話，耐勿說俚倒罷哉，再要替俚包瞞。”蕙貞也嘆道：“勿是包瞞呀，耐末也纏煞哉！小紅有仔爺孃、兄弟，再要坐坐馬車，阿是用場比仔倪大點。”
蓮生冷笑丟開。水煙吸罷，蕙貞仍並坐相陪，和蓮生美滿恩情，溫存浹洽，消磨了好一會，敲過十二點鐘，喚孃姨收擡安睡。
蕙貞在枕上又勸蓮生道：“小紅個人，兇末凶煞，搭耐是總算無啥。俚故歇客人末也賽過無撥，就不過耐一個人去搭俚繃繃場面。俚勿搭耐要好，再搭啥人要好？前轉明園俚要同耐拼命，倒勿是爲別樣，常恐耐做仔我，俚搭勿去哉。耐勿去仔，俚阿是要發極嗄？我倒勸耐，耐搭俚相好仔三四年，也該應摸着點俚脾氣個哉；稍微有點勿快活，耐噥得過就噥噥罷。俚有辰光就推扳仔點，耐也（要勿）去說俚。耐說仔俚，俚勿好來怪耐，倒說是倪教耐個閒話，倪末結仔俚幾花冤家。單是背後罵倪兩聲倒也罷哉，倘忙檯面沒碰着仔，俚末倒（要勿）面孔，搭倪相罵，倪阿要難爲情？”蓮生道：“耐說俚搭我要好，陸裡會要好嗄？我坎做俚辰光，俚搭我說：‘做倌人也難得勢，就不過無撥好客人；故歇有仔耐，故是再好也匆有。難再要去做一戶驀生客人，定歸勿做個哉。’我說：‘耐勿做末，就嫁撥我好哉。’俚嘴裡末也說是‘蠻好’，一徑搭漿下去。起初說要還清仔債末嫁哉；故歇還仔債，再說是爺孃勿許去。看俚光景，總歸勿肯嫁人，也匆曉得俚終究是啥意思。”蕙貞道：“故倒也無啥別樣意思。俚做慣仔倌人，到人家去規矩勿來，勿肯嫁。再歇兩年，年紀大仔點，難末要嫁耐哉。”蓮生搖手道：“倘然沈小紅要嫁撥我，我也討勿起。前兩年，三節開消，差勿多二千光景；今年加二勿對哉，還債、買物事同局帳，一節勿曾到，用撥俚二千多。耐想：我陸裡有幾花洋錢去用？”蕙貞復嘆道：“像倪一年就一千洋錢也好哉。”蓮生再要說時，只聽得當中間內阿巧睡夢中咳嗽聲音，遂被叉斷不提。
次日上午，王蓮生、張蕙貞初起身，管家來安即來稟說：“沈小紅搭孃姨請老爺過去說句閒話。”蕙貞忙問“甚事”，蓮生道：“陸裡有啥閒話？兩日勿去仔末，生來要來請哉（口宛）。”蕙貞尋思一會道：“我猜小紅定歸有點閒話要搭耐說。耐想囗？隨便啥辰光，耐一到仔該搭來，俚哚就曉得哉。故歐是曉得耐來裡該搭，來請耐，就無啥閒話也要想句把出來說說，噪得耐勿舒齊。耐說阿對？”蓮生不答。
比及用畢午餐，吸足煙癮，蓮生方思過去。蕙貞連連叮囑道：“耐到沈小紅搭去，小紅問耐陸裡來，耐就說是來裡該搭好哉。俚要搭耐說啥閒話，勿要緊個末依仔俚一半；耐就匆依俚，也（要勿）搭俚強，好好交搭俚說。小紅個人不過性子粳點，耐說明白仔，俚也無啥。耐記好仔，（要勿）忘記。”
蓮生答應下樓，並不坐轎，帶了來安出門，只見一個小孩子往南飛跑，彷彿是阿珠的兒子，想欲聲喚，已是不及。蓮生卻往北出東合興裡，由橫弄穿至西薈芳裡。阿珠早迎出門首，相隨上樓，同到房裡。沈小紅當自閒坐，手中執着一對翡翠雙蓮蓬在那裡玩弄；見了蓮生，也不起身，只冷笑道：“倪該搭勿請耐是想勿着個哉！兩日天有幾花公事，忙得來一埭也匆來。”蓮生佯笑坐下。阿珠接着笑道：“王老爺一請仔倒就來，還算倪有面孔，勿曾坍臺。先生，耐要謝謝我個囗。”說着，先絞把手巾，忙將茶碗放在煙盤裡，點起煙燈，說：“王老爺請用煙。”蓮生過去，躺在榻牀上手，吸起煙來。小紅便道：“同到該搭來，苦煞個囗。纔是笨手笨腳，無啥人來搭耐裝煙。”蓮生笑道：“啥人要耐裝煙嗄？’當時阿珠怞空迴避。
蓮生本已過癮，只略吸一口，即坐起來吸水煙。小紅乃將翡翠雙蓬蓬給蓮生看。蓮生問：“阿是賣珠寶個拿得來看？”小紅道：“是呀。我買哉，十六塊洋錢，比仔茶會浪阿貴點？”蓮生道：“耐有幾對蓮蓬來浪，也好哉；再去買得來做啥？”小紅道：“耐搭別人末去買仔，挨着我末就勿該應買哉？”蓮生道：“勿是說勿該應買；耐蓮蓬用勿着末，買別樣物事好哉。’”小紅道：“別樣物事再買哉（口宛）。蓮蓬用末用勿着。我爲仔氣匆過，定歸要買俚一對，多豁脫耐十六塊洋錢。”蓮生道：“價末耐拿十六塊洋錢去，隨便耐買啥。該個一對蓮蓬也無啥好，（要勿）買哉，阿對？”小紅道：“倪是人也無啥好，陸裡有好物事撥倪買？”蓮生低聲做勢道：“阿啃！先生客氣得來，啥人勿曉得上海灘浪沈小紅先生，再要說勿好！”小紅道：“倪末阿算得是先生（口夏）？比仔野雞也匆如（口宛）！惶恐哉囗，叫先生！”
蓮生料想說不過，不敢多言，仍嘿然躺下，一面取籤子燒煙，一面偷眼去看小紅。見小紅垂頭哆口，斜倚窗欄，手中還執那一對翡翠雙蓮蓬，將指甲掐着細細分數蓮子顆粒。蓮生大有不忍之心，只是無從解勸。
適值外場報說：“王老爺朋友來。”蓮生迎見，乃是洪善卿，進房即說道：“我先到東合興裡去尋耐，說去哉。我就曉得來裡該搭。”小紅敬上瓜子，笑向善卿道：“洪老爺，耐尋朋友倒會尋哚。王老爺剛剛到該搭來，也撥耐尋着哉。該搭王老爺難得來個（口宛），一徑來裡東合興裡。今朝爲仔倪請仔了、坎坎來一埭。晚歇原到東合興去。洪老爺，耐下轉要尋王老爺末，到東合興去尋好哉。東合興匆來浪，倒說勿定來裡啥場花。耐就等來浪東合興，王老爺完結仔事體轉去來，碰頭哉（口宛）。東合興賽過是王老爺個公館。”
小紅正在嘮叨，善卿呵呵一笑，剪住道：“（要勿）說哉！我來一埭聽耐說一埭，我聽仔也厭氣煞哉。”小紅道：“洪老爺說得勿差，倪是生來勿會說閒話，說出來就惹人氣。像人家會說會笑，阿要巴結！一樣打茶會，客人喜歡到俚哚去，同得去個朋友講講說說，也鬧熱點。到仔該搭，聽仔倪討氣閒話，才匆對哉，再要得罪朋友。耐說王老爺陸裡想得着到該搭來嗄！”善卿正色道：“小紅，（要勿）實概！王老爺做末做仔個張蕙貞，搭耐原蠻要好，耐也就噥噥罷。耐定歸要王老爺勿去做張蕙貞，在王老爺也無啥，聽仔耐閒話就匆去哉。不過我來裡說，張蕙貞也苦煞來浪，讓王老爺去照應點俚，耐也賽過做好事。”這幾句倒說得沈小紅盛氣都平，無言可答。於是，洪善卿、王蓮生談些別事。
已近黃昏，善卿將欲告辭，蓮生阻止了，卻去沈小紅耳邊悄悄說了幾句，聽不出說的什麼。只見小紅道：“耐去末哉（口宛），啥人拉牢耐嗄？”蓮生又說兩句，小紅道：“來匆來，隨耐個便。”蓮生乃與善卿相讓同行。小紅略送兩步，咕嚕道：“張蕙貞等來浪，定歸要去一埭末舒齊。”蓮生笑道：“張蕙貞搭勿去。”說着，下樓出門。善卿問：“到陸裡？”蓮生道：“到耐相好搭去。”
兩人往北，由同安裡穿至公陽裡周雙珠家。巧囤爲王蓮生叫過周雙玉的局，引蓮生至雙玉房裡。洪善卿也跟進去，見周雙玉睡在牀上。善卿踅到牀前，問雙玉：“阿是匆適意？”雙玉手拍牀沿，笑說：“洪老爺請坐囗，對勿住。”善卿即坐在牀前，與雙玉講話。
周雙珠從對過房裡過來，與王蓮生寒暄兩句，因請蓮生吸鴉片煙。巧囡卻裝水煙與善卿吸。善卿見是銀水煙筒，又見妝臺上一連排着五隻水煙筒，都是銀的，不禁詫異道：“雙玉個銀水煙筒有幾花嗄？”雙珠笑道：“故末也是倪無(女每)拍雙玉個馬屁哉囗。”雙玉聽見，嗔道：“阿姐末總瞎說！無(女每)拍倪個馬屁，阿要笑話！”善卿笑問其故，雙珠道：“就是前轉爲仔銀水煙筒，雙玉教客人去買仔一隻，難末無(女每)拿大阿姐、二阿姐個幾隻銀水煙筒，才撥仔雙玉。雙寶末一隻也無撥。”善卿道：“價末故歇再有啥勿適意？”雙玉接說道：“發寒熱呀。前日夜頭，客人碰和，一夜勿曾因，發仔個寒熱。”
說話之時，王蓮生燒成一口鴉片煙要吸，不料煙槍不通，斗門嚥住。雙珠先見，即道：“對過去吃罷，有隻老槍來浪。”當下，衆人翻過對過雙珠房間。善卿始與蓮生說知：翡翠頭面，先買幾色，價值若干，已面交與張蕙貞了。蓮生亦問善卿道：“有人說，沈小紅自家個用場大，耐阿曉得俚啥個用場？”善卿沈吟半晌，答道：“沈小紅也無啥用場；就爲仔坐馬車，用場大點。”蓮生聽說是坐馬車，並不在意。
談至上燈時候，蓮生要赴沈小紅之約，匆匆告別。善卿即在雙珠房裡便飯。往常善卿便飯，因是熟客，並不添菜，和雙珠、雙玉共桌而食。這晚雙玉不來，善卿說道：“雙玉爲啥三日兩頭勿適意？”雙珠道：“耐聽俚呀。陸裡有啥寒熱？才爲仔無(女每)忒歡喜仔了，俚裝個病。”善卿問：“爲啥裝病？”雙珠道：“前日夜頭，雙玉起初無撥局。剛剛我搭雙寶出局去末，接連有四張票頭來叫雙玉。相幫、轎子才匆來浪，連忙去喊雙室轉來。碰着雙寶檯面浪要轉個局，教相幫先拿轎子擡雙玉去出局，再去擡雙寶。等到雙寶轉來仔，再到雙玉搭去末，晚哉。轉到第四個局，檯面也散哉，客人也去哉。雙玉轉來，告訴仔無(女每)；生來同雙寶勿對，就說是雙寶耽擱仔了，要無(女每)去罵俚兩聲。無(女每)爲仔檯面浪轉局客人來裡雙寶房裡，勿曾說啥。難末雙玉勿舒齊哉，到仔房裡，‘乒乒乓乓’損家生。再碰着客人來碰和，一夜勿曾困，到明朝就說是匆適意。”善卿道：“雙寶苦惱子。碰着仔前世個冤家。”雙珠道：“先起頭無(女每)勿歡喜雙寶，爲仔俚勿會做生意，說兩聲；雙玉進來到故歇，雙寶打仔幾轉哉，才爲仔雙玉。”善卿道：“故歇雙玉搭耐阿要好？”雙珠道：“雙玉要好末要好，見仔我倒有點怕個。無(女每)隨便啥總依俚，我匆管俚生意好勿好，看匆過定歸要說個，讓俚去怪末哉！”善卿道：“耐說俚也匆要緊，俚阿敢怪耐！”
須臾，用過晚飯，善卿無事，即欲回店。雙珠也不甚留。洪善卿乃從周雙珠家出來，踅出公陽裡南口，向東步行。忽聽得背後有人叫聲“孃舅”。
善卿回頭一看，正是外甥趙樸齋，只着一件稀破的二藍洋布短襖，下身倒還是湖色熟羅套褲，趿着一雙京式鑲鞋，已戳出半隻腳指。善卿吃了一驚，急問道：“耐爲啥長衫也匆着嗄？”趙樸齋囁嚅多時，才說：“仁濟醫館出來，客棧裡耽擱仔兩日。缺仔幾百房飯錢，鋪蓋衣裳，才撥俚哚押來浪。”善卿道：“價末爲啥勿轉去嗄？”樸齋道：“原想要轉去，無撥銅錢。孃舅阿好借塊洋錢撥我去趁航船？”被善卿啐了一口，道：“耐個人再有面孔來見我！耐到上海來坍我個臺，耐再要叫我‘孃舅’末，撥兩記耳光耐吃！”善卿說了，轉身便走。樸齋緊跟在後，苦苦求告。
約走一箭多遠，善卿心想：無可如何，到底有礙體面，只得喝道：“同我到客棧裡去！”樸齋諾諾連聲，趨前引路，卻不往悅來棧，直引至六馬路一家小客棧，指道：“就來裡該搭。”善卿忍氣進門，向櫃檯上查問。那掌櫃的笑道：“陸裡有鋪蓋嗄！就不過一件長衫，脫下來押仔四百個銅錢。”善卿轉問樸齋，樸齋垂頭無語。善卿復狠狠的啐了一口，向身邊取出小洋錢，贖還長衫；再給一夜房錢，令小客棧暫留一宿，喝叫樸齋：“明朝到我行裡來！”樸齋答應，送出善卿。善卿毫不理會，叫把東洋車，自回南市鹹瓜街永昌參店，短嘆長吁，沒法處置。
次早，樸齋果然穿着長衫來了。善卿叫個出店，領樸齋去趁航船，只給三百銅錢與樸齋路上買點心。趙樸齋跟着出店，辭別洪善卿而去。
第二十四回終——