按：張小村、趙樸齋同行，至寶善街悅來客棧門首。樸齋道：“我去一埭就來，耐等一歇。”小村笑而諾之，獨自回棧。棧使開房點燈沖茶，小村自去鋪設煙盤過癮，吸不到兩口煙，趙樸齋竟回來了。小村詫異得很，問其如何。樸齋嘆口氣道：“（要勿）說起！”便將陸秀寶要打戒指一切情節仔細告訴小村，並說：“我故歇去，就來裡棋盤街浪望仔一望，望到俚房間裡來哚擺酒、豁拳、唱曲子，鬧熱得勢。想來就是姓施個客人。”小村笑道：“我看起來還有道理。耐想，今朝一日天就有客人，阿是客人等好來哚？無撥實概湊巧（口宛）！耐去上仔俚哚當水哉！姓施個客人末總也是上當水。耐想阿對？”
樸齋恍然大悟，從頭想起，越想越像，悔恨不迭。小村道：“難也（要勿）去說俚哉。以後耐（要勿）去仔末纔是哉！我也正要搭耐說：我有一頭生意來哚，就是十六鋪朝南大生米行裡，我明朝就要搬得去。我去仔，耐一干子住來裡棧房裡，終究勿是道理。最好末耐原轉去，託朋友尋起生意來再說。勿然就搬到耐哚孃舅店裡去，倒也省仔點房飯錢。耐說阿是？”樸齋尋思半晌，復嘆口氣道：“耐生意倒有哉，我用脫仔多花洋錢，一點點勿曾做啥。”小村道：“耐要來裡上海尋生意，倒是難囗。就等到一年半載，也說勿定尋得着尋勿着。耐先要自家有主意，（要勿）隔兩日用完仔洋錢，勿過去，撥來耐哚孃舅說，阿是無啥意思？”
樸齋尋思這話卻也不差，乃問道：“耐噪碰和，一場輸贏要幾花嗄？”小村道：“要是牌勿好，輸起來，就二三百洋錢也無啥希奇囗。”樸齋道：“耐輸仔阿撥俚哚？”小村道：“輸仔阿好勿撥嗄。”樸齋道：“陸裡來幾花洋錢去撥俚？”小村道：“耐勿曉得。來裡上海場花，只要名氣做得響末就好。耐看仔場面浪幾個人，好像闊天闊地，其實搭倪也差勿多，不過名氣響仔點。要是無撥仔名氣，阿好做啥生意吸？就算耐屋裡向該好幾花家當來裡，也無用（口宛）！耐看吳鬆橋，阿是個光身體？俚稍微有點名氣末，二三千洋錢手裡豁出豁進，無啥要緊。我是比勿得俚，價末要有啥用場，匯劃莊浪去，四五百洋錢也拿仔就是。耐陸裡曉得嗄！”樸齋道：“莊浪會拿仔末，原要還個（口宛）。”小村道：“故末也要自家算計哉囗。生意裡借轉點，碰着法有啥進益，補湊補湊末還脫哉。”樸齋聽他說來有理，仍是尋思不語。須臾各睡。
次早十九日，樸齋醒來，見小村打疊起行李，叫棧使喊小車。樸齋忙起身相送，送至大門外，再三囑託：“有啥生意，搭我吹噓吹噓。”小村滿口應承。
樸齋看小村押着小車去遠，方回棧內。吃過中飯，正要去閒遊散問，只見聚秀堂的外場手持陸秀寶名片來請。樸齋賭氣，把昨夜頭一個局錢給他帶回，外場那裡敢接。樸齋隨手撩下，望外便走。外場只得收起，趕上樸齋，說些好話。樸齋只做不聽見，自去四馬路花雨樓頂上泡一碗茶，吃過四五開，也覺沒甚意思，心想陸秀寶如此無情，倒不如原和王阿二混混，未始不妙。當下出花雨樓，朝南過打狗橋，徑往法界新街盡頭，從明王阿二門口，直上樓去，房間裡不見一人。
正在躊躇想要退下，不料一回身，王阿二捏手捏腳跟在後面，已到樓門口了。喜的樸齋故意彎腰一瞧，道：“咦！耐阿是要來嚇我？”王阿二站定，拍掌大笑道：“我來哚間壁郭孝婆搭，看見耐低倒仔頭只管走，我就曉得耐到倪搭來，跟來耐背後。看耐到仔房間裡，東張張，西張張，我末來裡好笑，要突出來哉呀！”樸齋也笑道：“我想勿到耐就來裡我背後，倒一嚇。”王阿二道：“阿是耐勿看見？眼睛大得來！”
說話時，那老孃姨送上煙茶二事，見了樸齋笑道：“趙先生，恭喜耐哉（口宛）！”樸齋愕然道：“我有啥喜嗄？”王阿二接嘴道：“耐算瞞倪阿是？勿可帳倪倒才曉得個哉。”樸齋道：“耐曉得哈囗？”王阿二不答，卻轉臉向老孃姨道：“耐聽俚，阿要惹人氣！倒好像是倪要吃醋，瞞仔倪。”老孃姨呵呵笑道：“趙先生，耐說末哉。倪搭勿比得堂子裡，耐就去開仔十個寶也匆關倪啥事，阿怕倪二小姐搭俚哚去吃醋？倪倒有几几花花醋哚，也吃勿得陸裡搭好（口宛）！”
樸齋聽說，方解其意，笑道：“耐嘆說陸秀寶，我只道仔耐哚說我有仔啥生意了恭喜我。”王阿二道：“耐有生意無生意，倪陸裡曉得嗄。”樸齋道：“價末陸秀寶搭開寶，耐倒曉得哉。故是張先生來搭耐嘆說個（口宛）。”老孃姨道：“張先生就搭耐來仔一埭，以後匆曾來歇。”王阿二道：“張先生是勿來哉。我搭耐說仔罷，倪搭用好包打聽來裡，阿有啥勿曉得？”樸齋道：“價末昨日夜頭是啥人住來哚陸秀寶搭，耐阿曉得？”王阿二努起嘴來道：“哪！是隻狗哉囗。”被樸齋一口啐道：“我要是住來哚末，也勿來問耐哉（口宛）！”王阿二冷笑道：“（要勿）塔我瞎說哉！開寶客人住仔一夜天，就匆去哉，耐騙啥人嗄！”樸齋嘆口氣，也冷笑道：“耐哚包打聽阿是個聾甏？教俚去喊個剃頭司務拿耳朵來作作清爽，再去做包打聽末哉。”王阿二聽說，知道是真情了，忙即問道：“阿是耐昨日夜頭匆來哚陸秀寶搭？”樸齋遂將陸秀寶如何倡議，如何受欺，如何變卦，如何絕交，前後大概略述一遍。
那老孃姨插口說道：“趙先生，也要算耐有主意哚，倒撥來耐看穿哉。耐阿曉得，倌人開寶是俚哚堂子裡口談（口宛），陸裡有真個嗄，差勿多要三四轉五六轉哚。耐末豁脫仔洋錢，再去上俚哚當水，啥犯着嗄？”王阿二道：“早曉得耐要去上俚哚當水末，倪倒勿如也說是清倌人，只怕比仔陸秀寶要像點哚。”樸齋嘻嘻的笑道：“耐前門是匆像哉，我來搭耐開肉後門走走，便當點阿好？”王阿二也不禁笑道：“耐個人啊，撥兩記耳光耐吃吃末好！”老孃姨隨後說道：“趙先生，耐也自家勿好。耐要聽仔張先生閒話，就來裡倪搭走走，勿到別場花去末，倒也匆去上俚哚當水哉。像倪搭阿有啥當水來撥耐上嗄？”樸齋道：“別場花是我也無撥，陸秀寶搭勿去仔，就不過該搭來走走。前幾日我心裡要想來，爲仔張先生，倘忙碰着仔，好像有點難爲情。難是張先生搬得去哉，也勿要緊哉。”
王阿二忙即問道：“阿是張先生尋着仔生意哉？”樸齋遂又將張小村現住十六鋪朝南大生米行裡的話，備達一遍。那老孃姨又插口說道：“趙先生，耐忒啥膽小哉。（要勿）說啥張先生倪搭匆來，就算俚來仔碰着耐來裡，也無啥要緊（口宛）。有辰光倪搭客人合好仔三四個朋友一淘來，纔是朋友，纔是客人，俚哚也算鬧熱點好白相；耐看見仔要難爲情殺哉！”王阿二道：“耐末真真是個鏟頭！張先生就是要打耐末，耐也打得過俚（口宛），怕俚啥嗄？要說是難爲情，倪生意只好（要勿）做哉。”
樸齋自覺慚愧，向榻牀躺下，把王阿二裝好的一口煙，拿過槍來，湊上燈去要吸，吸的不得法，焰騰騰燒起來了。王阿二在傍看着好笑。忽聽得間壁郭孝婆高聲叫：“二小姐。”王阿二慌的令老孃姨去看：“阿有啥人來哚？”老孃姨趕緊下樓。樸齋倒不在意，王阿二卻擡頭側耳細細的去聽。只聽得老孃姨即在自己門前和人說話，說了半晌，不中用，復叫道：“二小姐，耐下來囗。”恨得王阿二咬咬牙，悄地咒罵兩句，只得丟了樸齋，往下飛奔。
樸齋那口煙原沒有吸到底，也就坐起來聽是什麼事。只聽得王阿二走至半樓梯，先笑叫道：“長大爺，我道是啥人！”接着咕咕唧唧更不知說些甚話，聽不清楚。只聽得老孃姨隨後發急叫道：“徐大爺，我搭耐說唱”這一句還沒有說完，不料樓梯上一陣腳聲。早闖進兩個長大漢子。一個尚是冷笑面孔；一個竟揎拳攘臂，雄糾糾的據坐榻牀，扌若起煙槍，把煙盤亂搠，只嚷道：“拿煙來！”王阿二忙上前陪笑道：“孃姨來哚拿來哉。徐大爺（要勿）動氣。”
樸齋見來意不善，雖是氣不伏，卻是惹不得，便打鬧裡一溜煙走了，王阿二連送也不敢送。可巧老孃姨拿煙回來，在街相遇，一把拉住囑咐道：“日裡向人多，耐夜頭一點鐘再來，倪等來裡。”樸齋點頭會意。
那時太陽漸漸下山。樸齋並不到棧，胡亂在飯館裡吃了一頓飯，又去書場裡聽了一回書，捱過十二點鐘，仍往王阿二家，果然暢情快意，一度春宵。
明日午前回歸棧房，棧使迎訴道：“昨夜有個孃姨來尋仔耐好幾埭哚。”樸齋知道是聚秀堂的楊家(女每)，立意不睬。惟恐今日再來糾纏，索性躲避爲妙。一至飯後，連忙出門，惘惘然不知所往。初從石路向北出大馬路，既而進拋球場，兜了一個圈子，心下打算，畢竟到那裡去消遣消遣；忽想起吳鬆橋等碰和一局，且去孫素蘭家問問何妨。因轉彎過四馬路，徑往兆貴裡孫素蘭家，只向客堂裡問：“吳大少爺阿來裡？”外場回說：“勿曾來。”樸齋轉身要走，適爲孃姨金姐所見。因是前日一淘碰和的，乃明白告道：“阿是問吳大少爺？俚哚來裡尚仁裡楊媛媛搭碰和，耐去尋末哉。”
樸齋聽了出來，遂由兆貴裡對過同慶裡進去，便自直通尚仁裡。當並尋着了楊媛媛的條子，欣然摳衣踵門，望見左邊廂房裡一桌碰和，迎面坐的正是張小村。樸齋隔窗招呼，踅進房裡。張小村及吳鬆橋免不得寒暄兩句，李鶴汀只說聲“請坐”，周少和竟不理。趙樸齋站在吳鬆橋背後，靜看一回，自覺沒趣，訕汕告辭而去。
李鶴汀乃問吳鬆橋道：“俚阿做啥生意？”鬆橋道：“俚也出來白相相，無啥生意。”張小村道：“俚要尋點生意，耐阿有啥路道？”吳鬆橋嗤的笑道：“俚要做生意！耐看陸裡一樣生意末俚會做嗄？”大家一笑丟開。
比及碰完八圈，覈算籌碼，李鶴汀仍輸百元之數。楊媛媛道：“耐例會輸哚，我匆曾聽見耐贏歇（口宛）。”吳鬆橋道：“碰和就輸煞也匆要緊，只要牌九莊浪四五條統吃下來末，好哉（口宛）。”周少和道：“吃花酒無啥趣勢，倒勿如尤如意搭去翻翻本看。”李鶴汀微笑道：“尤如意搭，明朝去末哉。”張小村問道：“啥人請耐吃酒？”李鶴汀道：“就是黎篆鴻，勿然啥人高興去吃花酒。俚也匆請哈人，單是我搭四家叔兩家頭。要拆仔俚冷臺，故是跳得來好白相煞哉！”吳鬆橋道：“老老頭倒高興哚。”李鶴汀正色道：“我說倒也是俚本事。耐想囗，俚屋裡未幾花姨太太，外頭末堂子裡倌人，還有人家人，一榻括仔算起來，差勿多幾百哚！”周少和道：“到底阿有幾花現銀子？”李鶴汀道：“啥人去搭俚算嗄，連搭俚自家也有點模糊哉。要做起生意來，故末叫熱昏搭仔邪，幾千萬做去看，阿有啥陶成！”大家聽了，搖頭吐舌，讚歎一番，也就陸續散去。
李鶴汀隨意躺在榻牀上，伸了個懶腰，打了個呵欠。楊媛媛問：“阿要吃筒鴉片煙？”鶴汀說：“（要勿）吃。昨日鬧仔一夜天，今朝勿曾因醒，懶樸得勢。”媛媛道：“昨日去輸仔幾花嗄？”鶴汀道：“昨日還算好，連配仔兩條就停哉，價末也輸千把哚。”媛媛道：“我勸耐少賭賭末哉。難爲仔洋錢，還要糟蹋身體。耐要想翻本，我想俚哚人贏末倒拿仔進去哉，輸仔勿見得再拿出來撥來耐哉囗。”鶴汀笑道：“故是耐瞎說。先拿洋錢去買得來籌碼，有籌碼末總有洋錢來除，阿有啥拿匆出？就怕翻本翻勿轉，莊浪風頭轉仔點，俚哚倒勿打哉，贏勿動俚，無法仔！”媛媛道：“原是（口宛）。我說耐明朝要到尤如意搭去，算好仔幾花輸贏，索性再賭一場，翻得轉末翻仔，翻勿轉就氣輸仔罷哉。”鶴汀道：“故末勿差。倘然翻勿轉，我定規要戒賭哉。”媛媛道：“耐能夠戒脫仔勿賭，故是再好也匆有。就是要賭末，耐自家也留心點，像實概幾萬輸下去，耐末倒也無啥要緊，別人聽見仔阿要發極嗄？耐哚四老爺要問起倪來爲啥勿勸勸囗，倪倒吃仔俚閒話，也只好勿響（口宛）。”鶴汀道：“故是無价事個，四老爺勿說我倒來說耐？”媛媛道：“故歇說閒話個人多，例說勿定（口宛）。其實倪搭是耐自家高興賭仔兩場，閒人說起來，倒好像倪挑仔幾花頭錢哉。倪堂子裡勿是開啥賭場，也（要勿）挑啥頭錢（口宛）。”鶴汀道：“啥人來說耐嗄，耐自家來哚多心。”媛媛道：“難耐到尤如意搭去賭末哉；故末有啥閒話，也匆關倪事。”
說話時，鶴汀已自目餳吻瀝，微笑不言，媛媛也就剪住了。當下鶴汀朦朧上來，竟自睡去。媛媛知他欠困，並不聲喚，親自取一條絨毯替他悄地蓋上。鶴汀直睡至上燈以後，孃姨盛姐搬夜飯進房，鶴汀聽得碗響即又驚醒。楊媛媛問鶴汀道：“耐阿要先吃仔口，再去吃酒？”鶴汀一想，說道：“吃是倒吃勿落，點點也無啥。”盛姐道：“無撥啥小菜（口宛），我去教俚哚添兩樣。”鶴汀搖手道：“（要勿）去添，耐搭我盛一口口乾飯好哉。”媛媛道：“俚乃喜歡糟蛋，耐去開仔個糟蛋罷。”盛姐答應，立刻齊備。
鶴汀和媛媛同桌吃畢，恰值管家匡二從客棧裡來，見鶴汀稟說：“四老爺吃酒去哉，教大少爺也早點去。”媛媛道：“等俚哚請客票頭來仔了去，正好（口宛）。”鶴汀道：“早點去吃仔，早點轉去睏覺哉。”媛媛道：“耐身向裡有點勿舒齊末，原到倪搭來，比仔棧房裡也適意點哚。”鶴汀道：“兩日勿曾轉去，四老爺好像有點勿放心轉去個好。”媛媛也無別語。李鶴汀乃叫匡二跟着，從楊媛媛家出門赴席。
第十四回終——